查看: 5772|回复: 7

[纪念家驹] 阿龚细谈家驹11个关键词带你重走家駒的生命地圖 [复制链接]

BEYOND博物馆长

管理员

Beyond历史博物馆

Rank: 10

馆币: 160112 枚
积分: 9703
阅读权限: 255
积分: 26894
帖子: 4655
精华: 29
UID: 1

电梯直达

1^#

发表于 2018-7-2 09:10:50 |只看该作者 |倒序浏览

【道理王】
「其實家駒個人真係幾似一個大哥哥，佢唔係咁輕易發脾氣，但係佢會有好多道理講，不停將自己嘅睇法同大家講，想你明白佢。有時好容易真係俾佢感染到，接觸多咗，都會好易有佢咁樣嘅諗法。

「『哦』呢，佢就邊個都會『哦』，總之佢一睇唔過眼就會出聲，係咁『吟吟尋尋』，將佢嘅諗法係咁灌輸入去佢哋個腦裡面。當佢對一樣嘢好有興趣時，佢就會調番轉，係咁追住嚟問，想知多啲。」

【最後決定權】
Beyond四子鬧交，阿龔笑言經常都有，「拗嘢，喺超過一個人嘅情況之下一定會有，睇下拗乜嘢啦。拗完好多時都唔係話有啲咩嘈到要去打交，最後都係家駒做決定，其他成員對佢都好信任，對佢嘅決定都好受落。真係，有時佢嘅諗法，唔好話其他隊友，即使係其他人，佢嘅想法都好強。」

【床下底】
阿龔口中家駒身邊都會有結他，在家的梳化旁邊都有一支結他，音樂已融入他的世界，阿龔憶述家駒時時刻刻都找靈感，所以作了很多歌：「佢一拎起個木結他就嚟0架喇，用錄音機錄低佢，錄埋錄埋好多demo，收收埋埋喺床下底。成日都聽到佢話：『喂，寫隻歌俾你吖！』最後尾都係搵唔番，『寫過隻新嘅算喇！』都唔知躓咗去邊。

「佢睇電視，都拎住木結他，跟住廣告歌又會Jam下，又會同劇集配樂Jam歌，全日不停揸住支結他，已經見到佢將支結他完全融入佢生命裡面。」

【Ovation】
據知家駒放在家梳化旁的結他，是Martin 40，而他另外亦喜歡Ovation這個牌子。關於Ovation，網上流傳一個故事。

家駒擁有Ovation 12 & 6，有說是因為他一位好喜歡的結他手Robert Fripp都有過，所以更加想買。當時，家駒在琴行遇到Ovation 12 & 6，價格不菲，於是他先買了Ovation 6，另一支，他就跟店員說：「有啲貴，你俾我諗諗。」豈料人一走，琴行職員來電，說一位外國人已經快手落訂，於是家駒即向琴行要了這位客人電話。原價萬二的結他，家駒願出萬八。留意，這是90年代的事。結他一到手，他已急不及待，在演唱會彈《不再猶豫》。

家駒擁有的黑色Ovation，型號是Custom Legend，有別於一般木結他，Ovation的背、側板用上玻璃纖維物料，加上特定的弧度設計，令結他音色更飽滿。

Ovation結他是家駒的「最佳拍檔」，無論大大小小的演出或錄音，都會見到這把結他的身影。

【二樓後座】
眾人眼中家駒就像大哥哥，他教過的學生，有些仍在這一行發展，現時很多演唱會的樂隊做樂手。

當年紅透半邊天，二樓後座房外會有好多歌迷等。喺一個差不多得一個人咁闊嘅通道一齊等，妹妹仔就喺牆上寫下字，畫到牆都花晒。阿龔話：「有時家駒見到，就會話油番好幅牆啦﹗但油完，啲妹妹再寫過！」

【彌敦道貼街招】
有領軍才能，85年在堅道明愛中心自資舉辦《永遠等待演唱會》，之後越做越大，高山劇場、91年已去到紅館開騷。

「啱啱開始嗰陣佢哋會舉辦自己嘅演唱會，去唔同場地，例如明愛、高山劇場呢啲場地，佢哋都會自己去組織，自己去籌備自己嘅演唱會。佢哋當時真係自己印海報，自己出去，晚上三更半夜去彌敦道貼海報，所以佢哋所有嘅嘢，都係佢哋自己一手一腳完成，從宣傳到籌備都係。

「當時佢哋未有大型唱片公司支持，都係自己為咗理想開騷玩音樂，到後期開始接觸有經理人開始同佢哋傾，同經理人簽約，又入唱片公司，開始走上另一個階段，所謂地面嘅階段。」

【搭黑的被兜路】
有次，家駒提議成班朋友約埋去廣州睇崔健演唱會，這次旅程，好經典。

「約晒所有人，去紅磡火車站，搭火車上去廣州睇崔健演唱會，但當然都係有遲到嘅人就繼續遲到啦。」即係家駒都……

「卒之買定飛，就上唔到車啦，上唔到車，就有人提議搭直通車去深圳，再包車轉車上廣州，仲趕得切嘅。咁卒之我哋喺深圳包咗架車，就不斷俾人呃，兜咗去唔知邊度，係咁兜去上客，呢度上嗰度上。兜到去鄉村地方。我哋同司機講，喂，我哋包咗架車直去0架喎！佢話冇喎，冇包過！

「就係咁兜兜兜兜兜兜，兜到去我哋住嗰間酒店，一落車，第一件事，擺低晒啲袋入房，然後跑去演唱會場地，已經係唱最後兩首歌。咁冇辦法啦，睇完嗰兩首歌返酒店，夜晚喺酒店食飯。可能當時酒店員工覺得我哋啲樣又『比較奇怪』，個個都長頭髮黑眼鏡咁，古靈精怪。佢又唔知邊個打邊個，就揸住張紙，逐個咁嗌人簽名。大家就互相指來指去，你係劉德華、佢係黎明，亂寫一大餐喺度玩。個酒店員工都唔知頭唔知路，總之有人幫佢哋簽名，咁佢就高興喇。

「當時都幾得意，你睇到佢哋對於外面嘅人好有興趣，我哋又好似對佢好陌生但又好有興趣，結果第二日就約埋去廣州動物園睇動物。」

【大老鼠】
承上。一行人約埋翌日去廣州動物園，睇動物。阿龔笑：「估計應該幾有規模，應該幾多嘢睇啦。入到埸，捐嚟捐去，真係幾特別喎！

「入面有個籠，寫住『家犬』，擺兩隻屋企養嘅狗：有個籠寫住『家貓』，就擺兩隻屋企養嘅貓，仲有大老鼠。有一個好深嘅坑，入面有一隻，都唔知佢係似老鼠定係似乜嘢嘅動物，但就真係好大隻，大過隻狗，個牌寫住『大老鼠』。大家睇到笑騎騎，又幾得意，一齊出去玩，成班人傻下傻下，家駒份人又冇乜所謂。」

【吹神】
家駒曾就讀四邑商工總會新會商會學校，最後於博允英文中學畢業。他讀書未必好叻，但好奇心大，很多知識、學問，相信都是他入社會大學後學到。阿龔形容家駒會追住人地講，不斷追問，對不同行業也感興趣，問足一日都得，特別係當佢「眼仔碌碌」就知「聞到陣除有興趣」：「有啲電影朋友話，家駒對於電影好有興趣，會問拍攝程序係點，又想知點樣拍，有時仲好主動會話跟人哋一日場去睇，冇嘢做都搵啲嘢做，睇下人哋點拍。」

【遠見】
阿龔同家駒共事多年，覺得家駒思想遠大，而且，有好多嘢都想做。

「佢係咪諗嘢比其他人周詳呢？呢個我唔肯定；但佢諗得比人遠，呢個一定係。你日常同佢傾偈嘅時候，佢唔係諗緊聽日點樣後日點樣，或者呢兩年點樣。難聽啲講，『你唔好講到天花龍鳳，好宏大，好遠大嘅理想啦！』但係佢喺嗰方面真係有好多特別嘅概念，好似頭先講，好多好概念化嘅嘢，你可能會話：『鬼唔知咩？』但佢又真係會嘗試去做。佢未必係一個好踏實執行嘅人，但佢會係一個好有idea嘅人。你某程度上可以話佢係不停衝擊緊周圍嘅人。

【再見理想】
家駒亦好希望做到世界巡迴演出，將Beyond嘅音樂俾更多人知，將自己嘅音樂影響別人：「佢冇講最想去邊度唱，但佢思想無限、諗到好遠大，無界限俾自己，想同其他地方既人多交流。佢之前去過非洲，所以就有《Amani》呢首歌出現。」

Beyond四子獨立發展是家駒的想法，阿龔好耐之前已經聽過家駒提過：「佢想Beyond 四個人都有自己嘅專輯，因為每個人都有自己諗法，可以各有各嘅作品，佢提出過幾次。」