on.cc東網07月14日(二) 葉世榮搞Beyond騷係為宣揚家駒愛心

家驹精神

【on.cc東網專訊】Beyond成員葉世榮現身為明日放榜的中學生打氣，同場的Band界後輩Mr.即場與世榮集郵，又爭取時間向世榮偷師。世榮表示Beyond年代經常與隊員一同做校園騷，今晚再次出席同類活動亦勾起以前的回憶：「當年放榜都唔抱咩希望，嗰時已經鍾意音樂，壓力都比較少，知自己唔係個材料，盡咗力就OK。」

囡囡鍾情跳舞唱歌

講到上月29號囡囡三歲生日，世榮表示囡囡現於北京讀學前班，問可會回香港讀幼稚園，他直言：「都唔會，如果兩邊走會好辛苦，工作公司都喺北京，太太都喺北京，分開兩地會唔捨得個女，而且大陸地方大，囡囡都好開心。」問到生日如何慶祝，世榮表示一家人齊齊食餐飯，亦有買玩具：「不嬲都有買玩具，但佢成日都好快就唔玩，佢鐘意車仔，細細架模型。（鍾意音樂？）佢同我唔同類型，佢鍾情跳舞同唱歌，聽到音樂會手舞足蹈，等佢大啲畀佢摸吓樂器，佢有時都會用筷子敲嚟敲去，又會敲啲積木，拍子都幾準架！」

講到世榮早前希望搞個Beyond的演唱會，他直言要繼續努力：「今次想大家一齊做一個慈善騷，延續家駒嘅愛心，當年我哋都做好多慈善騷，依家好多人都會懷念家駒，但更重要係宣揚佢個個愛心，可能大家覺得今次係重組，但其實只係一個重聚。」

指Paul隨時Stand by

問到成員黃家強的態度一直強硬不想開騷，世榮直言家強有自己的觀點，亦有跟他強調今次只是重聚：「我五、六月有同佢傾過，有提出過停火協議，一齊停一停心中個團火，佢之前再提起Beyond都冇咁激，佢覺得冇家駒好難再一齊，就算再一齊都係個有缺憾嘅Beyond，我都明嘅，所以30周年紀念演唱會我都冇參加，但只係一次，延續愛心。」至於另一個成員黃貫中，世榮就話他隨時Stand by：「依家係等家強消化吓，而且紅館Book期都要時間。」