當年窮到燶 Beyond四子30蚊都要問人借
殿堂級樂隊Beyond成立35周年紀念展覽中，除詳述殿堂級樂隊Beyond的成長過程，還有訪問短片，擺放了舊音樂作品如唱片、絕版卡式帶及樂器等外，已清拆的舊「二樓後座」亦重見眼前，而激罕是有黃家駒的《昔日舞曲》真迹手稿、黃家駒、黃家強、黃貫中（Paul）在Beyond時代用過的結他，還有葉世榮的珍藏Beyond演唱會海報等。除多件珍貴展品外，是次展覽亦造就了各成員「四位一體」，似意味着恩怨終得化解外，而黃家駒的天價手稿等亦首度曝光，種種舊物讓歌迷重溫Beyond的「光輝歲月」，當中一本數簿更揭露窮band仔連30蚊都要問人借。據知家駒、家強及Paul的結他因獨一無二，曾有人出天價求轉售，「二樓後座」的紫色牆背後有一故事，就是當年Beyond四子尚未紅時，全是窮小子，為慳錢四子徒手搓石灰再親自髹上紫色，展品處處都滲着Beyond舊日的足迹。有趣是現場發現一本手寫數簿，內容洩露了Beyond四子當年曾經濟拮据，每月都要向經理人墊支度日，銀碼由30元至4,000元不等。據知當年四子雖不揮霍，但收入不穩定，不時求助經理人「周轉」，不過全屬「有借有還」，而世榮因邊夾band，邊任保險從業員，在樂隊中算「最富有」。
黃貫中接受訪問，指所借出的爛結他是他心目中的無價寶，他說：「呢支結他非常之珍貴，都好想畀人分享下我哋啲回憶，我自己好少攞出嚟睇，成日都問點解要撼支結他呢，就係後台一句戲語，家駒問我：『你估我紅色呢支硬，定你黑色呢支硬』，我話一陣出去試吓咪知囉，出到去彈到咁上下，大家一個眼色就撼埋一齊，當然係兩支一齊粉碎，哈哈，呢啲就係青春嘅piece片段，我當然會Keep番支結他啦，（會高價出售嗎？）賣？我幾多錢都唔賣㗎，邊個都唔賣，幾多錢都唔賣。（去唔去展覽？）有關家駒一切嘅嘢我都有興趣，如果我唔喺香港就去唔到，但個心好想去。」 莫欺少年穷啊 Band仔穷很正常。不像那些明星那样
页:
[1]