娛樂蘋台 | 20150609 | 今日家駒生忌 家強不會拜祭： 會另外揀日子去探哥哥
今日係Beyond主音家駒53歲生忌，三子即使無法再走在一起，但仍然不忘。世榮最準時，凌晨12時08分就於微博留言:「家駒生日快樂，你的愛心會一直延續下去。」家強就喺fb貼生日圖寫道:「哥，生日快樂！我出碟啦，好唔好聽呀！」至於Paul，就轉貼了單立文一張家駒舊照，說:「因為你離去的惋惜，更要紀念你來臨的可貴，生日快樂！」
家強噚晚(9號)喺中環HMV為新碟《沉香》舉行小型發布會，側田及恭碩良（Jun）專誠到賀，而老闆任賢齊（小齊）亦以神秘捧場，給家強一個驚喜。現場有逾半百粉絲支持，而家強唱咗三首歌，小齊仲即場買十隻碟，兼畀家強簽名，家強話：「你應該好忙寫緊歌喎，點解會嚟到？」
Jun表示當日喺赤柱放狗，聽到新歌Intro，令佢勾起好多回憶；側田就話自己聽Beyond歌曲長大，佢又讚同家強見面時好緊張，又指為人毫無架子，對於側田話細細個聽佢啲歌長大，家強笑言：「睇樣大家都差唔多啫﹗」
家強受訪時表示，事前唔知道小齊會嚟，佢笑言：「老闆應該要買一百隻碟先夠，不過佢出現我已經好開心。（有冇買自己碟習慣？）一路都冇呢個習慣，因為當年都唔興呢啲嘢，近幾年先興。」
家強透露已有七年冇出過專輯，佢解釋：「唔係唔想出，之前間公司有啲運作嘢，令碟出唔到，所以一味做歌，加上14年走TOUR，年頭先做到隻碟，今次仲收錄咗純音樂隻碟，嗰隻喺11年已做，等緊機會出。」
講到今日係兄長黃家駒生忌，問佢會否到場拜祭？家強表示：「唔會喺呢啲日子去拜，揀啲另外日子去探哥哥，唔好咁多記者及Fans喺度，可以同哥哥慢慢傾偈，嗰啲日子自己知道有特別意義，呢個意義年年都唔同。」會唔會小朋友去探伯伯？家強謂：「家人唔建議小朋友咁細去墳場，所以暫時未帶佢哋去。」
講到葉世榮搵咗佢未？佢話搵咗，咁大家傾成點？佢愕然表示：「點解你哋唔問佢？又唔係我搞。總之自己答案從來冇改變過。」咁對方有冇游說你？佢話：「游說唔到，佢都有聽我講，究竟係乜嘢情況下，先有呢個決定。但佢最後同我講咗句，用善心出發，相信個天最後會畀佢（世榮）做得成呢件事，我都希望佢（世榮）做得成，但我真係有我自己苦衷。」
若果世榮開得成會否去睇？佢話：「會呀，都會去睇。（唔驚fans叫你上台？）我冇考慮呢個問題，都係唔好去，唔好打擾人哋個騷。」
講到有啲歌迷都會失望，因為唔能夠三子走埋一齊？家強就話：「如果大家覺得三個唔可以走埋一齊，都係滿足唔到的話，咁其實Beyond係四個人，都冇辦法四人走埋一齊，達唔到佢哋滿足，三個人都係一樣，兩人唱又好，一人唱也好，加上三個人唱嘅歌，都唔係最原本家駒唱嘅歌，所以喺這情況下，唔好咁執着一切，一個人唱晒都可以代表一個紀念活動。」
http://bbs.beyondbwg.cn/xwb/images/bgimg/icon_logo.png 该贴已经同步到 家驹精神的微博
09/06/2015 黃家強拒合體：三個開騷已經唔係原裝
黃家強出席新專輯發布會，身為唱片公司老闆的任賢齊（小齊）及歌手恭碩良、側田亦有現身打氣，小齊即場購買十張專輯給家強簽名，恭碩良及側田則與家強交換新碟，家強獻唱三首新歌，期間更擺出封面Pose。
每年定一日去拜家駒
家強坦言沒想過小齊會現身，他說：「佢好忙，應該填梗詞，恭碩良同側田係我叫佢哋嚟撐我，所以小齊出現好驚喜。（買十張支持你？）應該掃100隻啦。（有冇買隻攞好意頭？）冇呢個習慣。」七年未有出唱片的家強說：「唔係唔想出，一路寫歌，加上又做巡迴。」對於明天是黃家駒生忌，家強說：「大家唔會知道我幾時去拜，我每年都會自己定一日，唔會畀記者同傳媒知。（會帶埋小朋友去？）小朋友媽咪比較迷信，唔想小朋友去墳場。」
世榮游說唔成功
家強透露已同葉世榮見面，他說：「你哋問番佢啦，佢搞唔係我搞，我答嘅嘢都係同之前一樣。（世榮游說你？）游說唔到，佢聽咗我講我喺咩情況底下，佢最後話『我係善心出發，天會幫我做得成』唔好賴我，我都有苦處。（唔做去睇？）都可以去睇。（唔怕歌迷即場拉你上台？）嘩，咁就唔去喇，唔好搞亂。」對於歌迷在網上留言好希望三子能再開騷，家強說：「如果三個都滿足，係咪應該四個先滿足呢？依家冇法達到，三個已經唔完美，三個唱歌已經唔係原裝，喺呢個情況，點解執着要三個一齊，世榮一個去唱都代表到。」
页:
[1]