BEYOND博物馆

标题: 13/Nov/2011 - 謝安琪唔啱嘴形黃貫中醒口技 (东方日报) [打印本页]

作者: qianfeng1113 时间: 2011-11-14 02:02:43 标题: 13/Nov/2011 - 謝安琪唔啱嘴形黃貫中醒口技 (东方日报)

謝安琪唔啱嘴形黃貫中醒口技

黃貫中（Paul）對謝安琪（Kay）有「一翼之恩」，當年是因一隻幾蚊雞的雞翼，令Kay對Paul留下深刻印象；今日「PK」敍舊，Paul才恍然得知原來昔日的「怕醜小妹妹」乃今日的「傑青天后」，Paul哥哥要認老之餘，都要驗吓眼。不過Paul在圈中敢言作風，令不擅與記者打交道的Kay也乘機向他請教講嘢技巧。

P：黃貫中　 K：謝安琪

P：我哋今次係咪第一次正式見面，坐低傾吓偈？

K：唔係呀，其實我識你好耐，讀大學時有幫阿源唱demo，嗰次我就喺二樓後座（band房）第一次見到你，你係Paul哥哥嘛。嗰時我得19、20歲，我仲跟你位engineer學結他添。

P：我聽佢哋講過呢件事，但對你真係冇乜印象囉，sorry呀。

K：嗰次我好開心呀，因為你請我食最馳名嘅炸雞翼，仲同我講呢啲係好嘢嚟架。

P：有咩？有冇叫你只可以食一隻咋？

K：你唔係特別叫畀我食架，不過你嗰句說話，我依家仲記得，我覺得你好搞笑同好funny。

P：可能嗰次大家都係擦身而過，況且我啲staff成日都帶啲女仔上嚟，我睇到咁環境，梗係識做，拿拿聲執嘢走人啦。

K：你唔記得唔出奇，都係十幾年前嘅事，我依家都三十幾歲，但你個樣同以前一樣，真係一啲都冇變。

P：係呀，因為我吸血架，每到月圓之夜，就會吸處女嘅血。

K（傻笑）：直到我入行後，真係唔係咁多機會同你講到嘢囉，只係做騷時先見到你。

P：其實你可以同我講，我請過你食雞翼嘛。

K：當年我好怕醜，見到Paul哥哥你，我驚到匿埋一邊，但我深信有機會同你傾偈，依家我終於等到可以向你正式自我介紹。我一直都係Beyond嘅fans，你出首張個人唱片，我一直支持架。我真係有睇你拍嘅劇，叫《淘氣雙子星》嘛，有「查星宇」同「查星宙」，我仲記得個名。

P：哈哈，李克勤係「查星宇」。

K：嗰時我仲好細個。

被揪秤好大鑊

P：真係唔到我唔認老，簡直係骨灰級嗰隻啦。

K：我覺得你講嘢真係好叻，好直接，好似頭先你講吸血咁，因為你承擔得起，你係好真嘅人，我都係架，不過轉數慢，講唔到好似你咁搞笑、咁funny。

P：但好似你咁樣就好大鑊，我意思係你好易講咗自己想講嘅嘢，好多時會畀人「揪」住你一句說話。我覺得你面對記者時，可以當佢哋唔係記者咁會好啲，關係建基於尊重，你敬我一尺，我敬你一丈，要明白做記者都好辛苦。

K：我初入行時，真係唔識答記者嘢，公司有位同事以前係記者，佢話同我呢啲新人做訪問真係好鬼煩，問一句，答一句。

P：咁你都可以講吓其他啫！可能我係男仔，理解能力會高啲，我好快會諗到記者要交功課，啲記者返到報館唔使咁頭痛就唔會亂寫。

K：你講得好啱，近幾年我先了解，要先照顧佢哋寫乜先，有時佢哋冇嘢寫，我會好緊張、擔心，心諗死啦！佢哋又唔知寫我乜，呢樣我係好蠢囉。

P：可能我係男仔會着數啲，唔怕畀人笑，有啲較激嘅言論出咗嚟，甚至畀人歪曲咗意思，但只要唔太過分，我都冇所謂，以前有一句說話：「有人寫好過冇人寫。」

唔介意講仔講緋聞

K：張繼聰（Kay老公）同我講，做訪問時盡力去做，如果出嚟嘅報道係唔好，都唔好咁介懷，依家我真係放開咗。

P：咪係囉，唔通告佢哋咩，咪益咗啲律師，我總覺得喺呢個圈會有對自己好嘅記者，以前有前輩教我千祈唔好當記者係朋友，會出賣你架！但我又覺得，唔會有記者會為一單C1而跣我呀！

K：學識咗友誼係要慢慢累積，記得我攞「傑青」時，有記者真心戥我高興，真係好開心。

P：我乜嘢問題都可以答，只係唔想講人哋，或唔關我嘅嘢啫。

K：講緋聞，其實我都唔抗拒，但就唔想答到好似宣傳咁，以前我要保護個仔，唔想講佢，依家發覺原來講湊仔，會畀人知照顧小朋友有唔同嘅方法，個仔又承擔到，所以我開始講佢。

P：做得公眾人物，人哋關注好正常，家陣選特首，都畀人刮晒啲緋聞出嚟寫啦，又虐妻又一腳踏幾船咁，所以你要釋懷。

K：可能同我性格有關，我講嘢又唔好笑，唔似你咁，好似我成日出席慈善活動，見啲記者又唔係好想寫咁。

P：你唔發覺每次做呢啲慈善活動，就算幾努力去講，記者支筆都係唔郁，就知佢哋叫你唔好再講啦，啲人眈天望地又有，睇錶又有，但一講到話要回應緋聞啦喎，嘩！佢哋即刻精神晒。

K：之前唔知，咪成日唔啱嘴形囉，搞到大家都唔開心，依家明啦，我會講記者有興趣寫嘅嘢，再搭啲我想佢哋寫嘅嘢囉。我都「賴」咗嘢好多年，先知發生乜事呀。

後記

Paul請了師弟陳偉霆、樂隊RubberBand、官恩娜及謝安琪擔任演唱會嘉賓，他「解釋」不請女友朱茵做嘉賓的理由是：「佢唔得閒呀！」但實情只因覺得請女友「好唔型」，可惜這位型男裝酷卻被一個電話殼徹底地出賣了！

事緣，朱茵曾向筆者透露剛收到fans為兩人訂造的Q版肖像電話殼，她會送一個給男友，而Paul訪問那天正是用了這個和他形象格格不入的小玩意，當筆者忍不住笑他「好老土時」，被踢爆的Paul即慘叫：「我被迫架！」隨即將電話收埋，但sorry，攝記已拍照了。

筆錄：音樂組　攝影：黃叔榮

場地：都會海逸—千鶴

化妝：Khaki（謝安琪）、Jonathan@MOD（黃貫中）

髮型：DERRICKNG@Queen's Private i Salon（謝安琪）、Niki@Headquarters（黃貫中）

服裝：PINK MARINIT（謝安琪）、AFFLICTION（黃貫中）

作者: beyondth 时间: 2011-11-14 08:51:43

PAUL的手机啥牌子的啊

欢迎光临 BEYOND博物馆 (http://bbs.beyondbwg.cn/)