拖手唱歌跳舞 黃貫中朱茵齊𠱁3歲女笑
51歲的Band壇大佬黃貫中（Paul），雖然久唔久就傳出和Beyond舊拍檔黃家強不和，不過「怒火Paul」每次面對妻女，總會收起戾氣純如綿羊，更甘願為兩歲半女兒黃鶯做一世牛牛𠻹。日前，呢對恩愛夫妻帶埋齊蔭小公主囡囡行商場，小黃鶯精靈可愛，化身父親的御用小Model。一家晒溫馨時，父母為𠱁愛女一笑，居然在商場手拖手圍圈唱兒歌跳舞，睇見乖女咔咔笑，父母心都甜晒！採訪 : 李維隆
同女兒一樣是十月生日的43歲朱茵，自逾兩年半前誕下小公主叉燒包後，就主力湊女，間中接散job。日前，她與好姊妹蔡少芬一齊飛去海南島，加埋久休復出的大美人林青霞等為湖南衛視真人騷節目《偶像來了》拍攝，一眾美魔女在泳池邊開心做瑜伽，勁養眼。
御用小Model
見寶貝女漸大，朱茵開始頻返內地搵錢，不過半復出的廿四孝靚媽，點忙都會與丈夫湊女天倫樂。日前晚上約8時，黃貫中一家三口和外傭現身尖沙咀海港城。當日Paul夫婦戴上情侶茶色鏡，陪同高咗又瘦咗嘅叉燒包行街街。齊蔭黃鶯兩歲八個月大，除上落扶手電梯外，她都愛一個人仔大步大步自己行，非常可愛。行行吓，母親行入Tommy Hilfiger Demin睇衫，仲攞咗一堆背心、連身裙等入試身室慢慢試。一試二十分鐘，兩父女點打發時間？咪就係在門口玩影相，小黃鶯見到假公仔又摸又笑，狀甚好奇，父親見愛女天真傻笑，即拎出手機拍下珍貴一刻。
阿女大晒
影完相，朱茵買了一袋戰利品滿足離開。點知阿女突然扭計，父母無發嬲，反而勁有愛心諗計𠱁乖女。兩夫婦伸出手拖工人，乖女即feel到係「唱兒歌嘅時候」，於是伸出小手拖實父親和工人姐姐，父母一邊細聲唱英文兒歌，一邊拖手轉圈，轉呀轉最後眾人一齊踎低，Yeah！成功冧掂小公主，叉燒包笑到露出牙仔，心情靚靚跟父親走人。
餅印家族
小黃鶯B女時，肥嘟嘟節瓜手，小眼睛似足父親BB嗰陣時個樣。大大吓，叉燒包雙眼大咗，𠵱家先似番索媽童年靚樣。
http://bbs.beyondbwg.cn/xwb/images/bgimg/icon_logo.png 该贴已经同步到 家驹精神的微博 Paul哥纯爷们 阿PAUL仲系咁潮，掂~ 真系快啊！！！都三岁啦！！！ 快参加下一季的爸爸去哪儿吧！！！！！！ 好可爱。。 好得意啊！ 好和谐！！
页:
[1]