2013年05月19日 【圖輯】家強辦紀念活動念家駒
對黃家強的定位，大家都認定他是Beyond成員、已故主音黃家駒的弟弟，即使哥哥已離世20年，家強亦成家立室已為人父，但在家駒的護蔭下仍似從未長大。家強終趁着今年哥哥離世周年紀念，作曲向哥哥訴說多年來活得好好，又開個人演唱會，以行動證明自己經得起風浪。撰文：羅美倫
今年是Beyond靈魂人物黃家駒離世二十年周年，已有家室、兒子的黃家強，趁着這個特別日子，寫了首歌《好好》給哥哥家駒，訴說在沒有哥哥的日子，他已學會應付挫折困難，亦正因為這首歌，促成他第一個個人演唱會「It's alright黃家強演唱會」，正好讓他再次以行動證明給哥哥看，他可長大獨立了。問到開個人演唱會壓力可大？家強說：「係興奮多過壓力，開演唱會我好隨緣，冇諗過今年搞。」有甚麼說話要跟家駒說講？家強開心地說：「記得嚟睇我演唱會呀！有首歌寫畀你，你梗係要嚟支持我開演唱會啦！」
多年來，家強在別人眼中，總是「黃家駒細佬」多過黃家強，問到可有特別感受？家強說：「演唱會唔係叫黃家駒細佬演唱會咪得囉，可能咁叫親切啲，我覺得做佢細佬係光榮，好多人想做都做唔到㖭！我喺阿哥身上學咗好多嘢，我唔會介意人哋咁叫我，最緊要係我做到自己嘢，阿哥睇到冇令佢失望就得。」
變身天使探訪
雖然Beyond演唱會開不成，家強卻因寫《好好》給家駒而開成個唱，寫這首歌花的時間並不多，家強說：「一直覺得佢擔心我，當然唔係擔心我學壞，我唔係主動嘅人，只會埋頭死做爛做，我阿哥性格唔係咁，佢做好另類嘅嘢都可以發揚光大，所以佢會擔心我，我想話畀佢知我其實已好好，無欲無求，生活幾舒服，唔想咁多競爭。」
雖然家強早已長大，但有時仍會做回家駒弟弟的角色，他說：「我喺屋企成日自言自語，有嘢決定唔到就會問阿哥，相信佢會畀答案，我信佢變咗天使周圍飛嚟睇我，唔使做人咁痛苦。我朋友有感應能量，佢話阿哥唔係普通天使，而係有法力，我好開心，仲相信呢樣嘢，相信因為好多人祝福佢，令佢升晒呢！」
家駒離世後，家強、黃貫中（Paul）、葉世榮Beyond三子就像失去重心，最終更要解散，甚至屢傳不和，Beyond迷最想見三子合體開演唱會，可惜一直未能如願，家強亦不作承諾，卻樂觀地說：「我覺得冇絕對，今年唔得，可能有生之年想一齊唔係冇可能，或者大家慢慢沉澱吓先，做自己開心嘅嘢最緊要。」三子最大分歧都在音樂上，家強坦言若不是2000年單飛各自發展，Beyond可能不會解散：「音樂上大家好主觀，分開後三個都學識面對自己、獨立做音樂，知自己鍾意乜嘢，再喺一齊時磨擦就大，就好似三個搬開住過後好難一齊住。」他坦言大有分歧，當中不涉利益：「為錢一齊早就一齊啦！為錢好易返埋一齊，因為目標一樣，唔使諗咁多音樂上嘅嘢，Beyond對自己有要求，唔係有錢就乜都做，未餓到瞓街，所以未諗呢樣嘢，能夠生活到，寧願開開心心玩音樂。」
做朋友冇問題
若目標一致，難道三子不能一致為紀念家駒而合體做騷嗎？家強笑住嘆道：「唉……得嘅，但唔能夠一個人話事，可惜啲啦，但唔緊要嘅，好開心大家各自有做到。」他承認自散band後，跟Paul、世榮的確少見面、少溝通：「咁大型活動要傾好多嘢，大家懷念方式、心情唔同，不如各自懷念，我諗家駒睇到、明㗎！收到我哋心意，個別做到都係感情嘅釋放，世榮都有寫歌，感激佢對哥哥仲咁熱情。」那非令人覺得三子不夠齊心？家強坦言：「唔齊心唔緊要，因Beyond真係喺05年已經解散，再冇Beyond，何必要有默契、何必齊心呢？如果齊心有默契就唔解散啦！」
三子屢傳不和，感情真的沒以前那麼好？家強笑說：「同朋友鬧吓交好正常啫，鬧完好番就冇不和啦！我承認當年係有少少唔開心，大家都退一步搞掂番就算，𠵱家只係音樂行唔番埋一齊，做朋友冇問題嘅，唔夾band反而大家仲有偈傾，當年磨擦都係因為夾band，最終件事係大家冇事，keep住友情，隊band唔夾仲好啦，不過冇絕對嘅，話唔定幾年後覺得返埋一齊都OK喎。」
页:
[1]