【新闻】东方互动- 2012/08/23 黃貫中 24味 唱爆沙灘騷
本帖最后由 缘希 于 2013-9-30 16:19 编辑Rock爆的黃貫中前日為沙灘音樂節打頭陣，全場high爆。熱衷政治的他大談釣魚島事件：「明明釣魚島係中國嘅，點解保釣人士會畀日本人拉？」有傳朱茵患產前抑鬱，他笑言：「係我抑鬱症好番，佢唔係有，係有少少……一時三刻好難令大肚婆冇晒脾氣。」
而組合24味昨午在沙灘音樂節打頭陣演出，吸引近五百名樂迷捧場，他們懶理小朋友在場大唱粗口歌，成員陳子聰還向樂迷淋水降溫。24味又口花花叫女粉絲除衫，有粉絲搞笑回應：「我除衫，你哋就除褲啦。」最後子聰只拉高上衣露出「肉背」。
RE: 東方日報 自豪有朱茵撐 Paul不好欺負
娛樂圈的人和事磨滑，反而變本加厲，火頭愈燒愈旺，除了透過音樂和畫筆表達情感，近年更搖滾到網絡世界，以微博跟粉絲交流。不過「英雄難過美人關」，朱茵正是火爆Paul的死穴！一連五天，Paul會剖白他是一個怎樣的人！我係白羊座，火車頭性格，衝動派，被冠以「火爆」、「躁底」都冇所謂，因為我只係據理力爭！唔通畀人踩上心口都忍？入行就嚟30年，我自問對得住舞台、對得住觀眾。每日除咗瞓覺嗰幾粒鐘，剩餘時間唔係做音樂就係湊狗，連阿茵（未婚妻朱茵）都只分得我少少時間，大部分時間同精神都放喺音樂同創作，我問心無愧！
被人挑釁最嬲
最近我同部分傳媒發生爭執，有人叫我息事寧人，怕我得罪傳媒影響星途，我唔肯就範，大家都當我癲佬，我覺得被針對就要出聲。凡事相對，你對我好，我可以對你恭敬，但若然故意挑釁我，就預咗我反擊。唔通踩上心口都唔出聲？可能我反應大到超乎大家意料之外，又或者其他藝人唔敢出聲，我敢，所以令到一啲人不知所措，嚇窒咗！我面對嘅不公平，自己唔講，邊個幫我？
好似今年三月某日，我同阿茵去街市買餸，一直被跟蹤偷影，最初冇出聲當係畀對方交差，點知返到屋企，對方架車就泊喺我間村屋門口，當時已經夜晚，因為佢架車引擎聲太大，我同村長上前問對方想點，對方竟然飛車飆走。條村又多細路又多老人家，當時條路又咁黑，咁樣開車非常危險！事情接連發生，我感受到自己同鄰居嘅安全受威脅，於是喺微博公開事件，仲上載我攞住棒球棍嘅相，我要畀佢哋知道：我黃貫中不好欺負！
火爆女友最堅
好多人都以為朱茵可以收服我嘅躁火，咁諗就大錯特錯，其實佢都好Rock、好有火，最重要喺佢知道我火得有理，經常都撐我，有時仲會比我更企硬、更講原則。喺我眼中，朱茵係一個好堅強、好有主見嘅女仔，佢好聰明，我知道自己做乜、要乜。佢喺呢行咁多年，見慣世面，我係咩人佢好清楚，同圈中人拍拖係咩一回事，佢亦心中有數。
阿茵性格光明磊落，拍拖希望大大方方，可惜娛樂圈唔係人人都夠膽公開真面目！回想追阿茵呢十四年，佢成日出題刁難我，少啲膽量都過唔到關。最難忘初拍拖，有次佢突然話去沙灘游水，佢話人多開心，去沙灘玩先至夠熱鬧，擺明考我牌啫！雖然我自問係實力派，但話晒都有唔少妹妹仔Fans，咁公開拍拖，唔係個個男明星都夠膽咁做，不過我冇有怕。而且講真，佢係「女神」都唔避忌，我又有乜所謂！好，佢要熱鬧，我就帶佢去大清水沙灘！
開心拍拖最冧
記得嗰日係假期，沙灘好多人，雖然好多人認得出我哋，但鏡頭後都係普通人，我哋如常鋪沙灘蓆搽太陽油，當時我同旁邊嗰位紋身哥哥仔吹水，我哋互相讚對方個紋身，佢同我講：「嘩！你條女真係好索喎！」我話：「你女友都好掂！」佢話：「望兩眼好啦！」我話：「你都係呀！」
講真，我知道好多追求阿茵嘅男仔條件好好，佢揀我，佢話同我一齊最開心係可以日光日白行旺角、銅鑼灣，唔使扮前後腳、唔使戴超戴帽戴口罩掩人耳目。最感動佢係有一次我哋拍拖撞見記者，我不但冇甩開佢隻手，反而拖得佢更實。如果有人欺負佢，我反應大過自己被欺負。
桃色陷阱最險
好多人話男人北上好易出事，但阿茵就好放心，佢啲Fans廣布中國，我做乜都有人向佢報料，所以登台、宣傳，佢都唔會跟嚟，佢對我係200%信任。而我就習慣乜都同佢講，有次我喺內地登台，半夜有個女仔叩我酒店房門，我以為係服務員就開門，原來係攞簽名，點知當我簽名嗰時，個女仔走入我間房話要「陪我傾偈」，我拿拿聲推佢出房兼鎖門。事後阿茵話我蠢，內地好多桃色陷阱，如果畀人影到個女仔離開我房，我就水洗唔清。佢成日講笑恐嚇我：「你咁醜樣我都肯同你一齊，好多人(目及)實你，等你行差踏錯就叫我飛你，你好自為之！」
Profile
姓名：黃貫中（Paul）
年齡：48歲
入行經過及代表作：1983年黃家駒、黃家強、黃貫中和葉世榮組成樂隊Beyond加入樂壇，創作多首大熱金曲，包括《真的愛妳》、《海闊天空》及《大地》等。1999年黃貫中作個人發展並組成樂隊汗，舉行多場個人演唱會及專輯。2006年他開設幕後製作公司，為其他歌手創作及監製歌曲。今年奪新城勁爆殿堂搖擺歌手大獎，搖滾地位獲肯定。
口述：黃貫中 筆錄：專案組
好有型。。支吉他
页:
[1]